आप कार्यकर्ताओ न कर्नल अजय कोठियाल क नेतृत्व मा मुख्य मंत्री आवास कूच करी कन घेराव करी
बिजळी की बढती दरों अर अनियमित बिजली कटौती से त्रस्त प्रदेश भर क हजारों आप कार्य कर्ताओं न कर्नल अजय कोठियाल क नेतृत्व मा आज मुख्य मंत्री आवास कूच करी कन घेराव करि। मुख्य मंत्री आवास पहुंचण से पैली सरकार तरफ बिटी प्रदर्शन कारियों तै रुकण खातिर भारी पुलिस बल तैनात करी कन चार लेयर मा बैरिकैंटिंग करी कन रुकण प्रयास करे ग्यायी।
यमकेश्वर बिधान सभा बिटी आप कार्य कर्ताओं नेतृत्व करी कन जनता आवाज बुलंद कन बाबत यमकेश्वर बिटी सैकडों आप कार्य कर्ताओं दगड़ी मुख्य मंत्री आवास तरफ एथर जाण से पैल पूर्व सैनिक सुदेश भट्ट तै रूकण खातिर पुलिस न उन पर लाठी मरण प्रयास करि। भारी पुलिस बल की चाक चौबंदी वावजूद भी पुलिस व प्रशासन क नाक तळ भारी पुलिस बल तै धता बते कन सुदेश भट्ट जनता मांग तै लेकन हजारों की तादाद मा पहुंचीन, कार्य कर्ताओं बीच बिटी अकेला ही मुख्य मंत्री आवास मा फाळ मन कोशिश मा गेट फंदण क कोशिश मा एचं चढ़ी गेन, जै कारण पुलिस बल क हाथ पांव फूल गेन। सुदेश भट्ट तै भारी संख्या मा पुलिस न धक्का मुक्की मा गेट बिटी मुड़ींन खींची द्याय। जैमा उ पर जरा जरा खछ्यांग लगी गींन ।
कर्नल कोठियाल दगड़ी सुदेश भट्ट व सैकडों आप कार्य कर्ताओं तै पुलिस गिरप्तार करी कन जेल भेज दयायि !आप नेता सुदेश भट्ट न बतायी कि प्रदेश की बेलगाम भाजपा सरकार द्वारा निरंतर जनता आवाज दबाण प्रयास कर्याणा च । आज प्रदेश क आम आदमी मूलभूत समस्याओं से त्रस्त च अर सरकार कुम्भ कर्णी नींद मा सियी। उपभोक्ताओं तै धामी सरकार सौ युनिट मुप्त बिजली क घोषंणा तै सुदेश भट्ट न चुनावी जुमला बते कन ब्वाल कि डबल ईंजन की पूर्ण बहुमत क जै सरकार तै साढे चार साल बाद तीसर मुख्य मंत्री बदलण बाद जनता क समस्या नी दिखयाणी वी सरकार से प्रदेश हित की कल्पना कन सिर्फ अर सिर्फ चुनावी घोषंणा मात्र च । यमकेश्वर बिटी आशीस अमोली, मदन भट्ट, आयूष कुकरेती, राजेंद्र नेगी, दिनेश, गणेश, सोम प्रकाश, सुरज रावत, संजय सिंह, मोहित जुगलान, रमन, शुभम, रावत,सहित अलग अलग गांवों बिटी सैकडो आप कार्य कर्ता मौजूद छ्यायी।
